بسم الله الرحمن الرحيم
3 ثانوي دي سنة مهمة وهتفرق معاك كتير في حياتك ..فلازم تكون مركز جدا فيها وعارف انت عايز ايه كويس.
3 ثانوي عموما سهلة وبسيطة من ناحية الدراسة بس الصعوبة فيها بتكون من ناحية الضغط النفسي والخوف من الفشل والافكار السلبية .
عشان تكون مستعد ليها لازم تكون حاطط هدف قدامك من قبل بدايتها وتعمل حسابك انك ممكن تعمل المستحيل عشان تحققه.
استقبل الثانوية بالتقرب من ربنا دي اهم حاجه وهتلاقي ربنا بيسهلها عليك في كل حاجه من نواحي كتيرة زي تنظيم الوقت وزيادة الفهم والتحصيل والراحة النفسية.
بعد كده لو انت حابب تشوف المناهج قبل بداية السنة هتلاقي شروحات كويسة جدا علي موقع " كايرو دار " هتلاقيها سهلة ومبسطة وهتساعدك كتير في اول السنة وفيه شروحات تانية احسن من كده علي اليوتيوب هتخليك واثق في نفسك واللي مش هتفهمه هتعيده تاني وتشوف شرح غيره لحد ما تفهمه ومش هتحتاج لدروس خصوصية كمان.
من الحاجات المهمة جدا تنظيم الوقت بانك تدي لكل حاجه وقتها المذاكرة وقتها والصلاة وقتها والرياضة وقتها والنوم وقته والترفيه وقته برده عشان تبقي مرتاح نفسيا وعندك اقبال علي المذاكرة والتحصيل ومتزهقش بسرعه.
هتيجي في نص السنة ممكن تحس ان حاجات اتراكمت عليك وثقتك في نفسك هتقل وممكن تفكر في عدم دخول الامتحانات واعادة السنة ..لو وصلت للمرحلة دي اعرف انك عبيط ولازم تخرج من الحالة دي بسرعة باي طريقة.. دي وساوس الشيطان اوعي تسمعلها وبص للناس اللي انت عايز تبقي زيهم وشوف هما تعبو قد ايه لحد ما وصلوا وانت كمان لازم تتعب.واتخيل نفسك السنة الجاية في المكان اللي انت بتحلم بيه من زمان.
تلاقي ناس زمايلك مستواهم عالي جدا في الدراسة وانت اقل منهم شويه ..متقولش دول اللي هينجحوا وانا هفشل لان هم نفسهم بيبقو خايفين لان الامتحانات محدش بيتوقعها ومحدش يعرف هو هيجيب كمان او هيدخل كلية ايه وممكن انت تجيب اعلي منهم كمان محدش يعرف !!
انصحك تبعد عن العلاقات العاطفية السنة دي لان دي من اسباب الخيبة في السنة دي لانك بتوجه ليها معظم تفكيرك ووقتك وبتنشغل بيها عن هدفك الاساسي واصبر لحد ما السنة تعدي وبعدين ابقي فكر واعمل اللي انت عايزه.
لو هتروح دروس خصوصية يبقي مينفعش تاخد في الماده الواحد اكتر من درس ..هو درس واحد عند مدرس واحد عشان متضيعش وقتك ولا تشتت تفكيرك ومتاخدش لوحدك بس ..روح مع المجموعة عشان توسع افاق تفكير وتحفزك انك تبقي من اوائل المجموعة.
دي كانت شوية نصائح وقواعد سهلة من واحد جرب وطلع عينه في الثانوية انصحك انك تمشي عليها هتلاقيها بتساعدك انك توصل للي انت عايزه وهتقلل تعبك شوية حاول تنشرها وساعد بيها ناس تانية وربنا هيوفقك ان شاء الله.